第一日

因公司的亞太區總部在香港，即係話有可能香港的同事他朝有日可能會搜尋到呢個網誌，所以都係唔好提公司名......

第一日番新工, 見左起碼50個人。上午人事部同事帶我做辦公室的通行證(證上我幅相影得我塊面幾瘦)，之後參觀樓下的健身室同興建中的標準泳池。員工可以免費健身室跟泳池，亦可免參加健康舞班同其他健身班，更衣室同淋浴間設施一應齊全，毛巾沐浴露冼頭水全部可以免費使用。跟住睇左2個同工作有關的DVD(影片製作非常認真)，午飯與全組同事在公司飯堂食飯，因為迎新的關係，午飯全入公司數。食完飯，電腦部同事安裝好我部手提電腦，同上司一齊做左2份報告，三點半又同公司主席開會(之前在雜誌見過佢個尊容)，成個鐘我係齋坐同微笑。開完會，上司俾2本產品目錄我，叫我明日揀2對鞋。每一季我可獲分配2對鞋，美其名係員工福利，但其實係擴闊宣傳渠道，以及當有其他公司來採購，可顯示員工對品牌忠心云云。

第一日，穩陣過左，明日，挑戰正式開始......

倫敦之最...

倫敦之最.....憎，是交通。。有幾憎？？有十個憎！！今日放工搭地鐵，四個站，盛惠２鎊２０便士（倫敦交通儲值咭價，買單程票要４鎊；順帶一提，倫敦交通儲值咭乃抄襲香港八達通之作），對這兒的物價，我已經到了麻木不仁的境地，反正交通費是必要支出，所以亦唔諗太多。但係地鐵由月台到車廂，唔單止熱到暈，而且完全無空氣流通。搭了只係４個站，個大腦話俾我聽．我的身體就快缺氧．．．．一出到地面，我全完有重生的感覺。

今日室外氣溫２０－２２c左右，地鐵車廂都熱成咁，可以想像夏天最熱果幾日有幾嚴重，最重要係熱都算啦，無空氣流通先至攞命！！倫敦地鐵年年加價，服務跟設施完全無改善，班員工又得閒就罷工，他朝我當選做倫敦市長，唔好講笑，一定炒左班地鐵公司高層兼解散公會．．（註：我無打算從政）不斷舉起「倫敦地鐵乃全世界最古老的地鐵系統」的旗幟也無補於事，只更突顯這其實像個「敗家仔」。

８月２４日泰晤士報刊登了倫敦地鐵的溫度圖，綠色：２６ｃ；黃色：２９ｃ；紅色：３２ｃ（You can view the full map by clicking on the image below.)

http://extras.timesonline.co.uk/pdfs/undergroundhotspots.pdf